الزيتون
كتبهارابح_التيجاني ، في 20 يناير 2011 الساعة: 15:16 م
الزيتون
رابح التيجاني
الله يبـــــاركها تربة ،
مكناس
مرتع الصبا ،
مجمع نـاس الطيبة ،
أهل الصفا والمحبة ،
مكناس
راحة للروح
ولافة بزينها
ولوانها الزاهية المذهبة،
فتانة
بالسر والسحر والشعر مصوبة ،
إيه عليها أيام
بعراصي الزيتون
كنا صغار
نضحكو ونبكيو بلا سبة ،
نقيلو نلعبوبباب الدار
حنا نقلبو
وواحد يتخبا ،
عفارت كنا
واعرين خطار
ولما نعياو نرجعو بالزربة ،
للخربة ،
ندورو بالطبلة
نشوفو بمحبة
لمي وبا ،
ويلا شبعنا
نرغبوهم نخرجو
يالله سيرو تلعبو ف العتبة ،
حدا العتبة
ما تفوتوش العتبة ،
الله عليها يام
حتى حاجة ما كانت صعبة ،
نتساراو مكناس حومة حومة
شادينها كعبة ،
بالفاخر نتعلمو الكتبة
فلبيبان ولحيوط الرطبة،
نعومو فلواد
وندرعو
نقطعوعرض بوفكران
بخشبة ،
نقلدو عومة الجرانة
أو عومة الكلب تابع كلبة ،
نطلعو لشجار الزيتون
نتعلقو بحال قرود الغابة ،
نقطفو زهر الحامض
ولارنج والليمون
ونسرحو مع الدالية والعنبة ،
نقلعو الحميضة والكرنينة
نحيدو التوت والكرموص والرمان
هادي خضرا وهادي طايبة ،
نتراشقو بعظام التغزاز
نلعبو الطرومبيا
ونديرو قتيتة بعظام المشماش
نصنعو المقلاع والكروصة
وشحال من لعبة ،
وكمنجة كرشها طارو
ووتارها كابلات
ويدها وقوسها قصبة ،
نجريوحفيانين
فالزناقي ضيقين
تابعين كرة مقولبة ،
ونسلتو لسطاد نشوفو الكوديم
ما تهمنا زرواطة ولا سمطة
ولا ركلة مجنبة ،
ولكن نشوفو حميدوش ومبيري
هادي شوتة وتخريجة
وهدي طيحة وقلبة ،
هوبا
تهزات الشبكة
إصابة إصابة ،
ونجيبو الصداع كلما خرجنا
ودعاوي البلا
سيرو الله يعطيكم ضربة ،
ونشكيو
نلقاو لفعالنا ألف كذبة ،
ونلبدو حدا السقاية
نبسلو على البنات
عطينا عفاك شربة ،
الخبازية وكوربات الهندية
والشفنج كل شفنجة يا شفنجة
بنينة ورطبة ،
الحوانت مصافة
ولرزاق مختلفة
مقسمة ومكتبة ،
الله عليها يام
بالمعاركة بالجبابرة
السويقة كراوة
ندقو لبواب
وإيوا أراك يا هربة ،
نهبطو حدورة مدردبة ،
نطلعو عقبة ،
نجريو بحال الزواق
من رحبة لرحبة ،
ونعاودو حكايات مشوقا
على باباخ هاز بيدو شجرة
ومحيرو وحماقا ومعيوقا
وفاطنة الشهبة ،
وحميدا قيبا ،
يحرش هادا على هادا
نتصارعو على الصحة والزعامة
وانت شحال مكلاصي ف الرتبة ؟
إيه عليها يام
والزاويا والقرايا وعيساوة
وتهامة وأهل توات وحمادشة
كانت عزيزة علينا الجدبة،
والجلسة مع الطلبة ،
وأتاي بالشيبة ،
يحفظكم من العين
خمسة وخميس
والحرمل والشبة ،
نقراو القرءان
للوالدين والجيران على ضو لامبا
أو الشمعة دايبة مدوبة ،
كان الما بارد فالخابية
واللبينة فالقربة ،
وهاي هاي يلا رشق لينا
نبرزطو الهبيل كيف بغينا
ونشبوه نشبة ،
هاالعسل ها الملوخيا
باش يغضب ديك الغضبة ،
وينوض علينا مندبة ،
ويتبعنا
يغراق ف الغيس حتى للركبة ،
ونضحكو
هانيين مهنيين
وديما سامرين فايقين
رادين البال للحومة
هادي مجلببة ملثمة ومنقبة ،
وهادي مقزبة ،
ما تفلت لينا لا صغيرة ولا كبيرة
هادي مزوجة وهدي عزبة ،
هادا عيا بالخدمة
وهادا ما ضرب فيها ضربة ،
هادي زوينة وهادي خايبة
هادي مقادا هادي عايبة ،
هادي عندها اليوم الخطبة
وغدا تمشي مع عريسها لاروبا ،
سعداتها
تخرج من الزروبا والدروبا
والخوف من الحناش والطوبة ،
أسيدي دارت طريق ف البحر
وفالزرب ترعة
وفالحيط ثقبة ،
زعما كنتناقشو
طارت خليها تطير
ما تضيعش الوجبة ،
إيه عليها يام
نديروها بستاش
ويلا حصلنا مشينا صوبة ،
ناكلو ونغوتو
الماكلة فيها زغبة ،
وندابزو مع عدو الحيوان
المسخوط جيف القطة بقنبة ،
قلنا لو سير حتى للصباح
فدمتك سبعة ديال لرواح
وزيد عليهم شحال من جن
لقالك باش تدافع
شوفلك محاميين صحاح
ولا تجيش حسن ،
عمر داود ما يعاود
هادي والتوبة ،
وشكون هاد داود
وغير يعاود يلا قدر يعاود
ولقى مازال القطة
ولقى مازال القنبة ،
الله عليها أيام
عشنا وشفنا وسمعنا
تعلمنا وتمتعنا
وشحال افتخارنا بالنخبة ،
بنشمسي والمسطاسي
المزوار والتراب والعرايشي
الصافي والسحاقي والوزاني
اليوسفي وبن الطايع
تشعر قدامهم برهبة،
واعتزازنا برموز الثقافة
المنيعي وبنزيدان
الدمناتي والزيتوني عبد السلام
وبوحمالة والحجام
والطريسي والجابري وبن حلام
والخطيب الإمام
ولمراني وبنعيسى والراشق
وشحال من أعلام
ليهم مكانة وهيبة،
وبنعبد الجليل و محيي الدين
والديغوسي ومولاي ادريس والقباب
وزين العابدين
والصايغ وبنعبود
والعلمي ومولاي مسعود
ومعلمي ولد منانة
بعودو"عندما ياتي المساء"
وتيمود والزغننة ،
وأراك أراك
على غنايا هنا وهناك
"يا الساخي بيا ومساك مساك
ياللي عقلى ما ينساك
وسالبة سالبة ،
سالباني يا بنت الناس
سالبة سالبة ،
والشتا تا تا تا
وولاد الحراثة والمعلم بوزكري
طيب لي خبزي بكري
دابا" ،
و"دويرة دويرة والشمس مع القمر
مزينها عشوية تفتح بالزهر
سيدي علي بنداود عندو بنيا صغيرا
تبكي وتبكيني وتقول أبويا "
إيه على الغربة
وآح من البعاد والغيبة،
وإيه عليها يام
وولاد مولاي مليانة
وسيدي عياد يالسوسي
أوا والماكنا عند راسو الماكنا
الأولياء الأصفياء
المبشورين الألبا ،
الشيخ الكامل وناس التصوف
القريبة من المعاني والمقربة ،
والمجدوب فسوق النسا
وعقول الحكمة المجربة ،
وسيدي قدور العلمي
مشات دارو
ف حمى رجال مكناس مكركبة ،
فيرمات التفاح واللوزفيها طرقان
ولات البلاد للموسم ولافوار والعودان
والسلعة مهربة،
وما نساش بسطاء كانو علامات
حموصة و معيزا و بهيون وشلا شخصيات
والكناوي بالطبل وقرقبة ،
وغريب على رجليه
سبق الطوبيس من الزيتون للهديم
والناس معجبة،
والمعلم الخياط
والمطوي والسبسي والغربال
يقصص العشبة ،
أوبا طاحت التشدية
إيوا هاك تقنديحا على الرقبة ،
إيه عليها يام
كانت النسمة نسمة
والغلة غلة والما ما
والخضرا خضرا
حلوا وعذبة ،
كنا سعداء حتى فشقانا
ما نعرفوش لا أحزان ولا نكبة ،
عرصة بادو
وعرصة بنسعيد
وكرمة دو ه دوه وتيران جبالة
والشراشروالسلوقية والروى
والدار البيضا ودارنا رايبة ،
طاحت الصمعة
كملو عليها واطاوها
لقاوها سبة ،
إيه وحجو لابسة كل ما لقات
وحنا تابعينها بلغوات
من الزيتون للقصبة ،
والغالي يلقط لوراق من الطريق
ويديرها فجيابولاش تليق
بوحدو عارف آش خبا ،
والعريصة والدحش مربوط
مسكين صابرللرهوط
وكلشي بغي يركب ركبة ،
سيرو الله يقطع حسكم
اللي ما رباوه ماليه
عند المخزن يتربى ،
إيوا هاك ؟
وباب اكبيش باب القزدير
باب الجديد باب منصور
باب بردعيين والبيبة،
وسيدي عمرو والمرس والنهضة
وروامزين وكاسكروطات مولاي با ،
والستينية والدار الكبيرة ولالاعودة والدريبة ،
وأبولو و فيلم لفريد
وفيلم لطراس بولبا ،
والمونديال والاطلس
ونشوفو دوستي
والجفون فايضة وساكبة ،
والبرج والسباتة وبني محمد
صهريج السواني والملاح
بريمة وسيدي بابا ،
مدرسة الفتح بقسامها وعلامها
الفقيه الجبلي
واللوحة بصلصالها وسماقها
وطريق الحاجب
بالصفصاف محجبة ،
ومول لواني ويا من يصوب رابوز
وخمال البياروالكواي
ومول حوايج للبيع والشواي ،
والغياط والطبال
والطراح والزبال
وحنا ما ضاربين حسبة ،
تطلع ولا تهبط
حنا إيه مالنا
ياك الدنيا لعبة ،
ويلا مرضنا
ما نعارفو ممرضات ولا طبا ،
دوانا زعتر وتومة وفليو وحلبة
ويلا شداتنا الكحبة
الله ينجينا وينجيكم من الكحبة
البيصارا بالزيت وكاس حليب
أو البلبولة براس الحانوت مطيبة ،
كنا كنحبو الحياة
وعندنا إرادة ورغبة ،
اليوم العراصي نهبوها نهبة ،
وزعوها ديور وقبور
حفات ليهم النقشة
والسيف نبا ،
والعود لدهم كبا
عمرو ما حبا وحيث حبا …
بني وعلي وسير وخلي
وفين الزيتون فين الزيتون
لقاوها سايبة ،
خربوها ما بقات طبيعة
ما بقا فضاء
وفين بنادم
كلشي حشروه فعلبة ،
فين عراسات السبت ولوانها
روج وروزي وصهبا ،
وبوخريص يغني لاسمهان
"مالي تفوتيت بلحظك الفتاك"
أودي مالي فتنت
بحال الليف بحال البا ،
بحال الكرشة بحال شكانبة ،
باب مراح أكدال
حمرية وسيدي سعيد وتولال
والتولالي يغني على حمان الحربيطي
وحنا نصفقو ونعاودو السرابة
ونرددو الحربة ،
والبوخا محزم
غادي بتعريجة يدمدم
والمعلمة شامة
وباعوت بلا مكبر صوت
يحمق بغناه الفيلالي
لعيالات فلعراسات والليالي
بالقوافي مسرسبة ،
محيح بموسيقى معجبة ،
وكيلوميت سيس
كيلوميت ديس
نجيبو من المطارح لبيليكول
باش نديرو السينيما
نتفرجو نفوجو
الناس مساكن معذبة ،
والعودات بباب لارمود بمرابط الخيل
على النبوري شادات النوبة ،
الفلاحة مساكن على الريق جاو
باش يحسنو الخلفة ،
وحنا نتعلمو بخفة
قواعد اللعبة ،
عرفنا ما عرفنا
ما كناش نعرفو الحبة ،
نقضيو باللي كان
وشيوخنا دايرين ليهم قبة ،
مازال واحد منهم مصدوم
من يوم بناو الكلية قلبو مغموم
تبارك الله
يدوز حداه طالب معنق طالبة
أيه أسيدي معانقين
وما يقولوش حتى السلام عليكوم
إيوا باز آخر الدنيا هادا
الله يسترنا ويستركوم
ويدينا ف الضو بعيد على هاد القوم ،
الله عليها أيام
رموزنا أهرام
دايزهوم الكلام،
والعيالات عيالات
قادات وحادقات
ركايز وساريات
ديرهم فكتافك والهناوات ،
الله عليها أيام
با الفقير وبابا قايدي
وبا عزوز ومولاي العربي…
ويكفي تعدادي
الدنيا هانية والسما صافية
والتحية المأدبة ،
ويلا الخيرات قلات
ما بقاتش مدفقة ومسيبة ،
ويلا ضاقت لوقات
نغبو غبة ،
نصيدو الحوت ف الما
نتبعوالطيرف السما
نطيبوه على الهدبة ،
وديما مرحبا
مرحبا وألف مرحبا ،
الصدر مفتوح
والخير موجود
وما تضرب حسبة ،
ودابا
المقاتلة فلقهاوي على والو
والمضاربة ،
هادا براني هادا ولد البلاد
والبزناسة والتخلويض
والقومان المحربة ،
الناس يالطيف ويا حفيظ
موترة مقلقة ومعصبة ،
والصحاب مشاو
ما بقات صحبة ،
اللي مات مات
واللي باقي شغلاتو القفة
لهاتو ظروفو القاسية الصعبة ،
ودارنا مخربة ،
مرسم الوالدين
تمنيت نبنيها طوبة طوبة ،
دابا لحباب غايبة ،
وليام الزوينة مشات
واللحظات اللي باقية غادا هاربة ،
وهانا ها حنا كنرابيو
مع اللي رابا ،
بقصيدة مهدبة ،
بالدارجة المعربة ،
بلغة واضحة ماشي مخشبة ،
نرابيو مع اللي رابا
وعلاش لا ؟
بوركوا با ؟
بوركوا با ؟؟؟.
ـــــــــــــــــــــــــــــــــــــــــــــــــــــــــ
التصنيفات : مقطوعات زجلية | دوّن الإدراج
يناير 20th, 2011 at 3:21 م
تعليق واحد على “الزيتون”
رابح_التيجاني قال:
يناير 19th, 2011 at 1:47 ص
تعليق على “الزيتون”
بنمحمدعبدالرزاق قال:
يناير 8th, 2011 at 9:56 م
أعتقد أن مخيلة الأستاذ رابح التيجاني في قصيدته الزجلية الرائعة “الزيتون” قد منحتنا فسحة تاريخية من حياة أهل هذا الحي الرائع، الذي كانت تقطنه الإنسانية الصادقة بعمقها المتجدر في صلب رجال هذا الحي التاريخي، الذي صنع الرجال، ورسخ فيهم تعاليم الوطنية الصادقة التي لا يمكنها أن تنسى رغم قساوة الزمن.
في القصيدة أشياء جميلة صنعتها طفولتنا البريئة دون وعى منا، وبدون استئذان، تعلمنا حب الطبيعة التي كانت تحيط بنا من كل مكان، أحببناها وقدسناها، وتربينا من خلال هذا الحب على احترام البيئة، وصونها.
كم هي جميلة ذكرى تلك الأيام، وكم هو جميل أن تصدر تلك الذكرى من قلب شاعر عاش بين أحضان ذلك الحي، ومنحه الحياة بكل عذوبتها، فشكرا يا صديقا لازال قلبه يخفق بالذكريات التي يعتز بها كل من عمر تلك الأرض الجميلة.
أخبرك أخي أن سينما المونديال وسينما الأطلس وسينما أبولو، وسينما أمبير وسينما ريجان،أصبحت ذكراها من الماضي،فقد أغلقت أبوابها بالمرة، وانتهى ذلك العهد الذي كنا مداومين على زيارتها لمشاهدة الافلام التي كنا نعشقها.
رابح_التيجاني قال:
يناير 9th, 2011 at 5:11 م
تحياتي وتقديري للأخ عبد الرزاق سليل حي الزيتون الأصيل ،هذا الحي الشبيه في غناه وحركية المجتمع به بزقاق المدق لنجيب محفوظ ، ولكم تمنيت ولا زلت حالما بكتابة عمل روائي يستلهم مضامينه من عمق الحياة وتوهج القيم وتجذر التجارب الانسانية بفضاء الزيتون الجميل. أشكرك على اهتمامك وعنايتك . رابح التيجاني